Unha representación do Concello de Cerceda, encabezada polo alcalde, Juan Manuel Rodríguez, comprobou o estado das obras que Adif está a executar na estación de Cerceda-Meirama. Á visita acudiron tamén as concelleiras Catrina Queijo, Cristina Capelán e María Carmen Martínez.

O obxectivo era avaliar o avance da actuación, destinada a mellorar a seguridade, a accesibilidade, a mobilidade e a interoperabilidade das instalacións ferroviarias. Os traballos forman parte dun plan de mellora impulsado por Adif xunto coas estacións de Ordes e Uxes que supera os 7 millóns de euros de investimento.

O alcalde de Cerceda, Juan Manuel Rodríguez, sinalou que estas actuacións responden parcialmente ás demandas trasladadas polo Concello nos últimos anos. “Estamos falando dunha infraestrutura que presentaba importantes carencias e que xeraba dúbidas entre as persoas usuarias, especialmente no relativo á accesibilidade e ás condicións do paso inferior”, indicou.

Na estación de Cerceda-Meirama, as actuacións inclúen a instalación de dous ascensores panorámicos para facilitar o paso entre vías, especialmente ás persoas con mobilidade reducida. Ademais, estase intervindo nas plataformas, o paso inferior, as ramplas e escaleiras.

O rexedor valorou positivamente que se estean a executar melloras na estación, aínda que advertiu de que será necesario comprobar o resultado final das actuacións unha vez rematadas: “Entendemos que vai supoñer un impulso importante para a estación e para o servizo ferroviario, pero tamén somos conscientes de que posiblemente non dea resposta a todas as necesidades existentes”.

Dende o Concello lembran que xa no ano 2023 se trasladara a Adif unha comunicación oficial advertindo das deficiencias existentes na estación. O documento ía acompañado de informes técnicos nos que se incidía nas condicións de accesibilidade e seguridade das instalacións. Especialmente, nas inquedanzas sobre a luminosidade e seguridade do paso subterráneo.

Neste sentido, o alcalde lembrou tamén que a actual estación de Cerceda-Meirama se atopa afastada dos principais núcleos de poboación do municipio. Este feito obriga a moitas persoas usuarias a desprazarse expresamente ata a infraestrutura. En resposta a esta problemática, o Concello xa executara unha senda peonil de 300 metros de longo e dous metros de ancho para mellorar o acceso.

Dende o goberno municipal reiteran que seguirán realizando un seguimento das obras e trasladando a Adif todas aquelas cuestións que consideren necesarias para garantir “o mellor servizo posible” da estación á veciñanza de Cerceda.

Os campos de fútbol do Roxo converteranse na capital do fútbol base durante o 29, o 30 e o 31 de maio con máis dun milleiro de xogadores da contorna. Será na decimooitava edición do Torneo de Fútbol Base Concello de Cerceda, organizado polo Concello de Cerceda, en colaboración co Atlético Cercedense, a Federación Galega de Fútbol e a Asociación Coruñesa de Epilepsia.

Este martes tivo lugar a presentación da cita deportiva, á que asistiron o alcalde de Cerceda, Juan Manuel Rodríguez; o concelleiro de Deportes, Óscar Golán; o director das Escolas de Fútbol Municipais, Alberto Pallas, e o presidente do Atlético Cercedense, Gabriel Bello.

Na presentación revelouse que participarán, polo menos, 56 equipos pertencentes a 16 clubs dunha ducia de concellos diferentes, á espera de posibles novas inscricións. A previsión é que xoguen en Cerceda máis de 1.100 nenos e nenas ao longo de toda a competición, xa asentada como unha das citas de referencia do fútbol base na zona.

Entre as novidades salientables está a ampliación da competición a tres días, en lugar dos dous nos que se viña celebrando ata agora; e a incorporación dunha nova categoría biberón, que se suma ás de prebenxamíns, benxamíns, alevíns, infantís e cadetes.

Durante a presentación do evento, os representantes municipais e da entidade deportiva destacaron o importante labor de coordinación entre o goberno municipal, o club e os colaboradores para facer posible unha competición desta entidade. A meta final é impulsar o deporte base, fomentar os valores do compañeirismo e da convivencia nas novas xeracións.

Juan Manuel Rodríguez destacou que “para nós é moi relevante organizar un torneo de fútbol base destas dimensións, impulsar o traballo dos clubs e promover o deporte entre os nenos e nenas”. O alcalde agradeceu aos colaboradores o seu traballo e convidou á veciñanza de Cerceda e da contorna a “acudir aos campos do Roxo, que se van converter nunha auténtica festa do balompé”.

Entre os clubs que presentarán escadras, atópanse, ademais do Atlético Cercedense, a SDC Órdenes, Unión Deportiva Carral, Escolas Deportivas O Dolmen de Tordoia, Xuventude Laracha, UD Paiosaco, Trazo CF, SD Sofán, Escolas Luis Calvo, Sporting Cambre, Sporting Burgo, Bergantiños FC, San Tirso SD, Betanzos CF, Santo Estevo Abellá SDC e SD Dubra.

Así mesmo, e do mesmo xeito que se fai con outras probas deportivas, o torneo estará caracterizado polo apoio social. Nesta ocasión o Concello colabora coa Asociación Coruñesa de Epilepsia, que instalará un stand nas inmediacións dos campos de fútbol para as persoas interesadas en apoiar o seu labor.

O Concello de Cerceda celebrou este venres a IV edición da proba deportiva solidaria ‘Os 11 das vías’, unha cita que continúa asentándose na axenda deportiva da contorna e que volveu combinar deporte, natureza e solidariedade arredor da Vía Verde Compostela-Tambre-Lengüelle.

Organizada polo Concello de Cerceda coa colaboración do Club Atlética A Silva, o Albergue da Estación e a Federación Galega de Atletismo, a proba visibilizou nesta ocasión o traballo da Asociación de Cancro Infantil e Xuvenil de Galicia (ASANOG), entidade beneficiaria da recadación solidaria do evento.

A xornada incluíu a carreira absoluta de 11 quilómetros, con tramos de terra e asfalto ao longo da Vía Verde, así como a andaina non competitiva ‘Un paseo pola vía’, de 5 quilómetros, e as distintas probas adaptadas para as categorías de menores. En total, o número de persoas inscritas ascendeu a 782 participantes.

Os asistentes puideron desfrutar tamén dun espazo de xogos tradicionais para os máis pequenos, ademais dos servizos incluídos coa inscrición, como avituallamento, agasallo conmemorativo e servizo de duchas.

Podes acceder aos gañadores e tempos nesta ligazón.

>>> Formulario de solicitude

>>> Formulario de solicitude

O Concello de Cerceda puxo en funcionamento a ampliación da Escola Infantil Municipal Os Pillabáns, unha actuación que permite incrementar a capacidade do centro, dar resposta á demanda existente e eliminar a listaxe de agarda nas matrículas.

A intervención consistiu en construír unha nova aula de 70 metros cadrados. Este mesmo luns xa foi empregada polos nenos e nenas de 1 a 3 anos da escola, que fixeron uso dos distintos xogos e entretementos didácticos á súa disposición no novo espazo. Ademais, conta cunha nova e moderna zona de hixiene para o alumnado.

A mellora permite ampliar a oferta do servizo, chegando ata arredor de 60 prazas. O investimento total ascendeu a 103.000 euros achegados polo Concello de Cerceda, aos que se suman 80.000 euros de financiamento da Xunta de Galicia.

O alcalde de Cerceda, Juan Manuel Rodríguez; a tenente de alcalde e concelleira de Benestar Social e Igualdade, Catrina Queijo, e a concelleira de Educación, Cristina Capelán, visitaron as novas instalacións no seu primeiro día en activo.

O rexedor subliñou a importancia dunha actuación que, lembrou, era un dos proxectos máis significativos que se estaban a acometer actualmente. “Estamos enormemente satisfeitos. Fundamentalmente, porque isto cumpre un compromiso importante deste mandato, que era a ampliación da Escola Infantil Municipal”, sinalou.

Rodríguez subliñou a aposta do Concello por manter este servizo básico baixo xestión municipal, dentro das políticas sociais do goberno municipal para favorecer a natalidade e a conciliación.

Neste sentido, recalcou as últimas estatísticas demográficas. “Hai uns datos respecto á natalidade en Cerceda moi positivos no último lustro”, apuntou, engadindo que o Concello traballa “humildemente por favorecer esa dinámica con axudas á natalidade, apoio educativo e medidas de conciliación que van máis alá das competencias propias”.

Entre estas iniciativas citou “o Bos Días Cole ou a ampliación da oferta de campamentos e as actividades culturais e deportivas, con melloras progresivas, máis espazos e maior cantidade”, que contribúen a facilitar a vida das familias do municipio.

O alcalde avanzou ademais que, de continuar esta tendencia demográfica, o Concello estudará novas expansións deste servizo público: “Se a natalidade segue incrementándose, a nosa aposta será a medio prazo crear outro espazo educativo que dea resposta a esa demanda”.

Axudas á natalidade

No marco destas políticas, o Concello mantén aberta a convocatoria de axudas á natalidade, cun importe de 300 euros por unidade familiar. Están destinadas a nacementos, adopcións ou acollementos producidos entre o 1 de novembro do ano pasado e o 30 de outubro deste ano.

O prazo de solicitude permanece aberto ata o 30 de novembro, podendo tramitarse no Rexistro do Concello ou a través da sede electrónica, sede.cerceda.es.

O Concello de Cerceda, no marco do seu plan de mellora de infraestruturas municipais, continúa a impulsar diversas actuacións na parroquia de Meirama co obxectivo de reforzar os servizos e equipamentos dispoñibles para a veciñanza. O alcalde, Juan Manuel Rodríguez, visitou os traballos en curso acompañado pola tenente de alcalde, Catrina Queijo, e polo concelleiro de Medio Rural, Ángel Gestal.

Unha das intervencións máis destacadas está a desenvolverse na antiga escola unitaria da parroquia, onde se está a executar un proxecto de mellora de eficiencia enerxética para acondicionar o local social. As actuacións inclúen a substitución da cuberta por tella nova, a colocación de illamento térmico exterior, a instalación dunha bomba de calor aire-aire, a renovación da iluminación mediante tecnoloxía LED e a implantación dun sistema de monitorización do consumo eléctrico.

O investimento nesta obra ascende a 65.536,41 euros que redundarán nun beneficio social. O rexedor destacou que “vai mellorar o confort das persoas que empregan o espazo” e que se trata “dun lugar que aglutina moita actividade a nivel social, que dinamiza a parroquia, polo que no rural é fundamental darlle ese impulso”.

Por outra banda, Meirama contará proximamente cunha nova estación depuradora de augas residuais. A infraestrutura de tratamento atópase xa finalizada, á espera da súa conexión á rede eléctrica. Esta actuación supuxo un investimento próximo aos 190.000 euros, nun contrato que inclúe tamén, de forma complementaria, a execución dunha canalización de saneamento na zona de Ribasoutas, na parroquia de Cerceda.

Ademais, os representantes do goberno municipal comprobaron o estado do estacionamento da igrexa, que xa se levaba empregando de xeito funcional os últimos anos e que agora será foco dunha segunda fase de actuación. A mellora, desenvolvida ao abeiro dun convenio co Arcebispado, incluirá a humanización do espazo mediante a creación dunha zona axardinada con árbores e mobiliario urbano. Está previsto que os traballos comecen en breve.

Sobre este proxecto, Juan Manuel Rodríguez indicou que, “aínda que se estaba empregando de maneira provisional, existía unha necesidade de mellora e un potencial que imos facer realidade con esta intervención”. Así mesmo, remarcou a mellora na mobilidade peonil coa senda executada ao comezo do mandato, en 2023.

O alcalde destacou o conxunto destas actuacións, que cualificou de “importantes”, e asegurou que “non irán enfrontadas con outras obras ou actuacións que estamos planificando na parroquia”, ao tempo que incidiu en que “Meirama é unha parroquia que ten potencial para mellorar e a nosa intención é, paso a paso, ir dándolle ese avance”.

>>> Formulario de inscricción

O programa ven a reforzar a cobertura de alimentos e/ou asistencia de material básica.

Poden solicitalo familias con menores de 18 anos a cargo que se atopen por debaixo do limiar da pobreza severa.

As tarxetas so funcionan nos establecementos colaboradores.

Fotografía: Táboa de cálculo de ingresos por unidade de consumo inferiores ao 40% da renda media nacional segundo o tipo de fogar.

Información Servizos Sociais 981 68 60 68

Con data 21 de abril foron publicadas no Boletín Oficial da Provincia da Coruña nº73 as bases da convocatoria das axudas ao fomento da natalidade e para o asentamento poboacional do Concello de Cerceda para a anualidade 2026.

Esta convocatoria ten por obxecto establecer as bases das axudas económicas ás familias do Concello de Cerceda, co obxecto de impulsar estratexias para fixar e fomentar o aumento da poboación municipal e o seu rexuvenecemento, evitando o despoboamento rural.

Poderán ser persoas beneficiarias destas axudas os proxenitores ou, no seu caso, as familias acolledoras dos menores nacidos, adoptados ou acollidos entre o 1 de novembro do ano 2025 e o 30 de outubro do ano 2026.

Para máis información no Departamento de Servizos Sociais ou no teléfono 981 686 068

PUBLICACION BOP

MODELO DE SOLICITUDE 

Attachments:

File
SOLICITUDE.pdf

Cerceda acollerá o vindeiro 16 de maio a quinta edición da Poseidon Race, unha carreira de obstáculos (OCR) organizada polo club OCR Cerceda coa colaboración do Concello e da Deputación da Coruña. Este mediodía tivo lugar o acto de presentación da proba, ao que asistiron o alcalde de Cerceda, Juan Manuel Rodríguez; o concelleiro de Deportes, Óscar Golán, e o presidente da entidade deportiva, Álvaro Sánchez.

A organización agarda unha participación de preto de 800 persoas, consolidando a cita como unha das máis destacadas do calendario nacional e europeo. A competición inclúe as categorías Elite, Starter, Popular Parellas e Popular Party. As carreiras comezarán ás 14:00 horas coa saída da categoría Elite, rematando arredor das 20:00 horas coa entrega de premios das categorías populares.

A competición desenvolverase no Aquapark de Cerceda e nas súas inmediacións, un escenario que reforza o atractivo do evento ao combinar as instalacións acuáticas coa contorna natural.

A categoría Elite afrontará un percorrido de 10 quilómetros, mentres que as categorías Starter e Popular completarán 8 quilómetros, con arredor de 70 obstáculos ao longo do circuíto. Nas categorías populares estímase a participación de máis de 500 persoas, nun formato que fomenta o traballo en equipo ao permitirse a axuda entre competidores.

Inscricións e participantes

As persoas interesadas en inscribirse poden apuntarse na páxina web www.ccnorte.com. A recollida de dorsais terá lugar o propio día do evento, na zona de saída, a partir das 12:00 horas.

Está prevista a participación de atletas de numerosos países, entre eles Portugal, Venezuela, Colombia, Estonia, Bélxica, Dinamarca, Francia, Panamá, Chequia, Letonia, Polonia, Suíza ou Italia. De feito, a Poseidon Race será puntuable para as ligas Nacional AOCO, North Finals e para a clasificatoria do campionato do mundo OCRWC, o que dá mostra da súa relevancia.

O alcalde de Cerceda agradeceu o traballo do club e destacou a “total disposición” do Concello a apoiar citas deportivas como a Poseidon Race, que “contribúen a promover o deporte e a poñer en valor espazos como o Aquapark, ademais de proxectar Cerceda a nivel nacional e internacional”.

Pola súa banda, desde o club tamén agradeceron o apoio do Concello e da Deputación, “sen os que sería imposible celebrar un evento desta magnitude”.