Actualidade
O Concello de Cerceda avanza no seu compromiso cos espazos públicos e a seguridade viaria cun novo conxunto de actuacións para o segundo semestre de 2026 en distintos puntos do municipio. O obxectivo é afondar no mantemento, unha tarefa esencial para garantir a calidade de vida dos veciños e veciñas.
En agosto arrancará unha campaña de sinalización horizontal dotada con 15.000 euros: pasos de peóns, prazas para persoas con mobilidade reducida, prazas en batería e en liña, zonas de carga e descarga, vaos, símbolos de "ceda o paso", paradas de autobús e taxi e outras marcas viarias para mellorar a ordenación do tráfico e a seguridade.
O alcalde de Cerceda, Juan Manuel Rodríguez, salientou a importancia de coidar o patrimonio viario existente: "Como alcalde debo dicir que levamos tempo facendo un esforzo por investir e crear novas infraestruturas, mais tamén é importante facer fincapé no mantemento do preexistente”.
Neste sentido, o rexedor recoñeceu que “cuestións como o pintado dos viais urbanos presentan a día de hoxe un claro marxe de mellora. Son pequenos detalles que significan moito no día a día. Por iso lle imos dar un lavado de cara, con cargo ao orzamento 2026 en vigor neste momento, que vai potenciar a imaxe do noso municipio".
Sinalización vertical, espazos peonís e traballos de roza
Tamén en agosto comezará renovarse a sinalización vertical, cunha primeira partida de 5.000 euros para sinais de STOP, limitacións e prohibicións, perigo, pasos de peóns, estacionamento reservado para persoas con mobilidade reducida, espellos viarios e pilonas, segundo as necesidades detectadas polos servizos técnicos municipais.
Tralos arranxos puntuais dos últimos meses, o Concello continuará renovando as beirarrúas do núcleo urbano, as beiravías e substituirá baldosas deterioradas nas rúas Tierno Galván, avenida de Galicia, avenida da Coruña e avenida do Mesón, para seguir despois noutras zonas do municipio. A campaña de reparación de firmes actuará inicialmente en Cobeláns e no polígono industrial, e a limpeza de gabias continuará nas Encrobas, Brazal, Rodís e Coence, mellorando a drenaxe e reducindo a vexetación nas marxes.
Nos traballos de roza combinaranse medios propios e contratación externa para completar as actuacións pendentes en Rodís e Monte Xalo, e continuará o mantemento en Xesteda, parcelas municipais e fincas destinadas a eventos do Concello. Así mesmo, os operarios reforzarán a limpeza en zonas peonís por mor do crecemento da vexetación propio desta época.
Todo isto forma parte da programación ordinaria de conservación das infraestruturas municipais e supón un importante esforzo de investimento para seguir mellorando a seguridade viaria, a accesibilidade e o estado dos espazos públicos en beneficio da veciñanza.
O Concello de Cerceda celebrará o vindeiro sábado 25 de xullo a XXVIII edición da Festa Gastronómica do Cochiño, no lugar de Acevedo. Xa consolidada como unha das citas referentes no calendario festivo da contorna, reunirá a veciñanza e visitantes arredor deste prato estrela nunha longa xornada que rematará coas actuacións da París de Noia e Los Satélites.
Ás 14:00 horas terá lugar o xantar popular con degustación de cochiño, churrasco, polbo e produtos da cociña galega, cun custo de 15 euros por ración. Os tickets poderán adquirirse no Viveiro de Empresas de Acevedo, de luns a venres de 9:00 a 21:00 horas ata o 21 de xullo.
Ás 20:00 horas será a quenda das orquestras Los Satélites e París de Noia. Con todo, a música comezará antes coa animación do grupo Faíscas da Pontraga e a charanga Santa Compaña ao longo da xornada.
Artesanía e marca de parcelas
Así mesmo, a Festa do Cochiño tamén deixará espazo á artesanía co mercado Brota do Norte, mentres que os nenos e nenas poderán divertirse en inchables gratuítos. A marca de parcelas para as carpas poderase facer a partir das 17:00 horas do 23 de xullo.
O Concello de Cerceda encárgase de organizar a festa coa colaboración de Turismo de Galicia, Galicia Calidade, Turismo da Deputación da Coruña e a Mancomunidade de Ordes.
O alcalde, Juan Manuel Rodríguez, animou a veciñanza e os visitantes a non faltar a esta cita: “A Festa do Cochiño é xa un clásico do noso verán e un motivo de orgullo para todo o municipio. Falamos dunha celebración que leva case tres décadas reunindo a xente arredor da nosa gastronomía e das nosas tradicións, e ese é o mellor reflexo do arraigo que ten entre a veciñanza”.
CONSELLERÍA DO MEDIO RURAL
ORDE do 23 de xuño de 2026 pola que se regula a utilización de maquinaria durante a época de perigo alto, nos supostos de índice de risco de incendio forestal moi alto ou extremo.
>>> Ver ou descargar documento completo
O Concello de Cerceda beneficiouse na convocatoria para o ano 2023 do procedemento de concesión de axudas correspondentes ao Programa de incentivos para a implantación de instalación de enerxías renovables térmicas en edificios non residenciais, establecementos e infraestruturas do sector público, no marco do Plan de recuperación, transformación e resiliencia, financiado pola Unión Europea- NextGenerationEU (código de procedemento IN422O), das seguintes actuacións:
- “Instalación dunha caldeira de pellets na Escola Infantil de Cerceda”(Solicitude IN422O-166).
Orzamento: 48.450,00 euros máis IVE
Contía da axuda: 24.000 euros .
- “Instalación dunha estufa de pellets na Escola Unitaria de Queixas, Cerceda”(Solicitude IN422O-165).
Orzamento: 2.630,00 euros máis IVE
Contía da axuda: 2.386,72 euros .
O Concello de Cerceda recepcionou as obras correspondentes a dous contratos financiados pola Deputación da Coruña a través do Plan Único (POS+), cun investimento total que supera os 201.000 euros. As actuacións centráronse na mellora de viais e na canalización de redes de pluviais e de abastecemento.
O primeiro contrato, cun financiamento de 127.283,62 euros, incluíu a mellora dos accesos de Abelleira e Boedo, na parroquia de Queixas, onde se renovou o firme dun viario de 865 metros, canalizouse a rede de abastecemento de auga potable e consolidouse a calzada cun muro de pedra de granito. Desde o Concello avanzan que se producirán novas melloras.
Así mesmo, tamén se actuou en Brazal de Abaixo, na parroquia de Rodís, coa canalización da rede de pluviais, a execución de beiravías e un muro de formigón armado.
O segundo contrato, dotado con 73.884,78 euros, abrangue catro intervencións. En Sandián, canalizáronse as pluviais en ámbalas marxes do viario e adecuouse o firme. Nas localidades de Cova das Andes e Vilarvello, na parroquia de Rodís, mellorouse o firme con aglomerado en quente, e tamén se renovou un treito da rúa Gardería.
O alcalde de Cerceda, Juan Manuel Rodríguez, salientou a relevancia destas actuacións: "Son obras que melloran o día a día dos veciños e veciñas, tanto na mobilidade como na seguridade viaria e nos servizos básicos. Desde o Concello seguimos a traballar para manter e mellorar as infraestruturas en todas as parroquias".
Tempada do 20 de xuño ao 06 de setembro
Horario: 14:30-20:30 horas
Todas as 𝐩𝐞𝐫𝐬𝐨𝐚𝐬 𝐞𝐦𝐩𝐚𝐝𝐫𝐨𝐚𝐝𝐚𝐬 𝐭𝐞𝐧̃𝐞𝐧 𝐚𝐜𝐜𝐞𝐬𝐨 𝐠𝐫𝐚𝐭𝐮𝐢𝐭𝐨, para elo deben achegarse ao Rexistro Municipal para comprobar a que están empadroadas, entregarelles un bono nominativo,que deberán presentar ao acceder a piscina.
As persoas non empadroadas, deben comprar a súa entrada a través da ligazón
https://coruna.sacatuentrada.es/es
ou ben na Oficina Virtual Tributaria do Concello de Cerceda
Calquera dúbida 981685036
Os campos de fútbol do Roxo será escenario os días 20 e 21 de xuño do Torneo Internacional de Fútbol Base SUB9 & SUB11 CUP, organizado por Tadi Sports coa colaboración do Concello de Cerceda. A competición chega á súa III edición na categoría Sub-9 e estreará a primeira edición da Sub-11. Na presentación participaron o alcalde de Cerceda, Juan Manuel Rodríguez, o concelleiro de Deportes, Óscar Golán, e Adrián Cagigao e Diego Martínez, por parte de Tadi Sports.
O torneo reunirá as mellores canteiras do noroeste peninsular. Entre os equipos confirmados figuran o Deportivo da Coruña, o Celta de Vigo, o Real Oviedo, o FC Porto, o Sporting Clube de Braga, o Vitória de Guimarães, o CD Lugo e o Racing de Ferrol, entre outros. O Atlético Cercedense tamén competirá, exercendo como anfitrión.
Na categoría Sub-9 participan 20 equipos e na Sub-11, 24, cunha fase de grupos e dúas fases finais dependendo da clasificación en cada grupo: unha fase Ouro para os primeiros e unha fase Prata para o resto. Os partidos durarán 20 minutos a tempo corrido, agás as semifinais (un tempo de 25 minutos) e a final (dous tempos de 15 minutos).
O torneo tamén outorgará distincións ao mellor adestrador e á mellor afección. As entradas poden adquirirse en www.tadisports.com. As instalacións contarán con servizos de comida, xeadería, cantina e sorteos de premios, como camisolas asinadas polos xogadores do primeiro equipo dos clubs participantes.
O alcalde destacou que "é un orgullo para Cerceda acoller un torneo internacional desta magnitude. Dende o Concello apostamos polo deporte base como ferramenta de formación e convivencia, e citas coma esta sitúannos no mapa".
Dende o Concello animan a toda a veciñanza a achegarse ao torneo, animar aos xogadores e gozar co seu talento nas etapas formativas.
O IMSERSO abre o prazo para novas solicitudes para o Programa de Turismo para a tempada 2026/2027 que comeza o día 22 de xuño e remata o día 10 de xullo de 2026.
Solicitantes:
a) Persoas residentes en España que reúnan calquera dos seguintes requisitos:
- Ser pensionista de xubilación do Sistema Público español de Pensións.
- Ser pensionista de viuvez con 55 ou máis anos de idade.
- Ser pensionista por outros conceptos ou perceptor de prestacións ou subsidios de desemprego, en todos os casos con 60 anos cumpridos.
- Ser titular ou beneficiario do Sistema da Seguridade Social, con 65 ou máis anos cumpridos.
b) Os españois residentes no estranxeiro sempre que reúnan os requisitos esixidos no apartado a) anterior.
c) Os españois de orixe emigrantes que retornasen a España, sempre que sexan pensionistas dos sistemas públicos de seguridade social do país ou países aos que emigrasen.
As persoas usuarias poderán ir acompañadas polo seu cónxuxe, parella de feito ou persoa coa que se constitúa unha unión estable e de convivencia con análoga relación de afectividade á conxugal, sen necesidade de que éstos reúnan os requisitos de idade ou pensión.
Asimesmo poderán ir acompañadas dos fillos con discapacidade en grao igual ou superior ao 45%, sempre que a viaxe a realice cos seus pais e ocupe cama supletoria na mesma habitación do hotel ou, no seu caso, abonen o suplemento establecido para cuartos individuales que estará suxeito á dispoñibilidade de prazas.
Para máis información no Departamento de Servizos Sociais ou no teléfono 981 686 068
A Xunta de Goberno Local aprobou o dia 27/05/2026 as bases reguladoras da convocatoria de axudas municipais á escolarización para o curso 2026/2027, o que se fan públicas aos efectos de inicio de prazo de solicitude das mesmas.
Anexo II: Comprobación de datos dos membros da unidade familiar (pdf)
Anexo III:Xustificación de axudas para a escolarización (pdf)
O Concello de Cerceda fai un balance positivo do XVIII Torneo de Fútbol Base, que pechou unha edición de récord. Ao longo de tres días de competición, os campos do Roxo acolleron preto de 1.100 xogadores e xogadoras e unhas 4.000 persoas entre participantes, familias e afeccionados, coroando a cita como un dos grandes eventos do deporte base na comarca.
O torneo, organizado polo Concello en colaboración co Atlético Cercedense, a Federación Galega de Fútbol e a Asociación Coruñesa de Epilepsia, estivo marcado este ano pola incorporación dunha nova categoría biberón, que se sumou ás de prebenxamíns, benxamíns, alevíns, infantís e cadetes.
O venres arrincou a competición coa estrea da categoría biberón. O sábado disputáronse os encontros de alevíns, infantís e cadetes, e o domingo foi a quenda de prebenxamíns e benxamíns. En total, tomaron parte 56 equipos procedentes de diversos puntos da provincia.
O alcalde de Cerceda, Juan Manuel Rodríguez, amosou a súa satisfacción polo desenvolvemento do torneo: "Estamos moi satisfeitos co resultado desta decimoitava edición. Ver os campos do Roxo cheos de nenos e nenas xogando ao fútbol durante tres días é o mellor reflexo da importancia que cobrou esta cita".
O rexedor tamén destacou “a aposta do Concello pola promoción do deporte base, polos valores de convivencia e compañeirismo que inculca nos máis pequenos e pequenas, xusto nunha etapa na que se están formando como persoas”. Por último, quixo agradecer "o traballo descomunal de todos os que colaboraron organizando a competición".
